Welsh National Theatre yn cyhoeddi’u Prif Gyllidwr wrth i Ymddiriedolaeth Elusennol Colwinston gefnogi’u tymor agoriadol

Gyda chynhyrchiad cyntaf y Welsh National Theatre yn agor nos yfory (nos Wener 16 Ionawr) yn Theatr y Grand Abertawe, cyhoeddwyd mai Ymddiriedolaeth Elusennol Colwinston fydd y Prif Gyllidwr ar gyfer y tymor agoriadol.

Ers ei sefydlu yn 1995 gan y sylfaenydd a’r cadeirydd Mathew Prichard CBE, mae’r Ymddiriedolaeth wedi bod yn rhannu breindaliadau a dderbyniwyd o gynhyrchiad The Mousetrap yn Llundain – y ddrama dirgelwch llofruddiaeth a ysgrifennwyd gan nain Mathew, Agatha Christie – er mwyn cefnogi sefydliadau sy’n cyflawni gwaith o ansawdd uchel ar draws y celfyddydau, yn enwedig y rhai sy’n gweithio er budd Cymru.

I ddathlu Pen-blwydd yr Ymddiriedolaeth yn 30 oed a mwy na 30,000 o berfformiadau o The Mousetrap ers i'r ddrama agor ar 8 Mehefin 1952, lansiwyd Cronfa Pen-blwydd i ddathlu mynegiant creadigol a chrefft adrodd straeon, boed hynny drwy gerddoriaeth, opera, perfformio, y celfyddydau gweledol, arddangosfeydd, neu'r gair ysgrifenedig, gan gefnogi prosiectau sydd wedi’u cynllunio i sicrhau'r effaith fwyaf a'r mwynhad gorau i gynulleidfaoedd. Mae’r Welsh National Theatre yn un o un ar ddeg o sefydliadau i dderbyn grant arbennig gan y Gronfa. 

Mae gan y Welsh National Theatre, a sefydlwyd ar y cyd gan yr actor Michael Sheen, weledigaeth i greu gwaith o safon fyd-eang o Gymru a’i rannu â’r byd, gan ddod â doniau o Gymru at ei gilydd i greu theatr uchelgeisiol sy’n dod â stori’r wlad yn fyw.

Mae tymor cyntaf y cwmni yn agor nos yfory gyda Our Town, cyd-gynhyrchiad â’r Rose Theatre lle mae campwaith y dramodydd Americanaidd Thornton Wilder yn cael ei berfformio gyda gwedd Gymreig, a hynny yn Abertawe, Llandudno, yr Wyddgrug a Kingston-upon-Thames. Ym mis Tachwedd, yn nrama epig newydd y dramodydd Gary Owen, Owain & Henry, bydd Michael Sheen yn chwarae rhan Owain Glyndŵr mewn cyd-gynhyrchiad â Chanolfan Mileniwm Cymru ar ail lwyfan mwyaf Ewrop.

Meddai Michael Sheen, Cyfarwyddwr Artistig y Welsh National Theatre: “Rydyn ni’n diolch yn ddiffuant i Mathew Prichard a’r Colwinston Charitable Trust am gydnabod ein huchelgais ar gyfer Welsh National Theatre.  Pan fydd cynulleidfaoedd ledled Cymru a Llundain yn llenwi theatrau i brofi ein tymor cyntaf, byddan nhw’n gallu gwneud hynny nawr yn gwybod bod ein cwmni’n dilyn ôl traed yr adroddwr straeon anghygoel, Agatha Christie.”

Ychwanegodd Sharon Gilburd, prif swyddog gweithredol sefydlol y Welsh National Theatre: “Pan sefydlwyd y theatr gennym, ein strategaeth oedd archwilio amrywiaeth o lwybrau ariannu i gefnogi’r weledigaeth. Allwn ni ddim diolch ddigon i Mathew ac Ymddiriedolaeth Elusennol Colwinston am gydnabod ein gwerthoedd cyffredin a gobeithio mai dyma ddechrau perthynas hir.” 

Meddai Mathew Prichard, Cadeirydd Ymddiriedolaeth Elusennol Colwinston: “Mae’r Ymddiriedolaeth yn falch o ddathlu 30 mlynedd o weithio gyda llawer o sefydliadau celfyddydol o ansawdd uchel ledled gwledydd Prydain drwy ddyfarnu Grant Pen-blwydd arbennig i’r Welsh National Theatre i gefnogi cynyrchiadau o Our Town ac Owain & Henry yn ystod eu tymor cyntaf yn 2026.

“Treuliodd fy Mam-gu ei hoes yn cael ei swyno gan y Celfyddydau. Ysgrifennodd i ddiddanu ac roedd wrth ei bodd yn cael ei diddanu gan gynifer o wahanol ffurfiau celf. Rwy'n parhau i fod yn ddiolchgar i'r holl ymarferwyr yn y Celfyddydau sy'n parhau i ddod â'i gwaith yn fyw ac sydd wedi galluogi Ymddiriedolaeth Colwinston i fod yn rhan o brosiectau fyddai wedi bod yn agos at ei chalon yn fy marn i. Fy uchelgais yw y bydd y Gronfa Pen-blwydd 30 yn parhau i annog hyn i ddigwydd." 

Mae tocynnau ar gyfer tymor agoriadol y Welsh National Theatre ar gael yma.