BBC Studios yn buddsoddi yn Welsh National Theatre i ddarganfod doniau newydd yng Nghymru

Mae BBC Studios yn buddsoddi yn theatr newydd Welsh National Theatre wrth i’r ddau sefydliad ddod ynghyd i greu cyfleoedd i leisiau newydd o Gymru gael swyddi creadigol ym maes theatr a theledu.

Gweledigaeth y theatr, a sefydlwyd gan yr actor Michael Sheen ar ddechrau 2025, yw datblygu llwyfan ar gyfer doniau Cymru wrth greu dramâu graddfa fawr fydd yn taro tant yng Nghymru ac ar draws y byd.

Bydd y buddsoddiad gan gwmni BBC Studios Drama Productions yn ariannu’r gwaith o recriwtio prif sgowt doniau ar gyfer Welsh Net, cynllun a ddychmygwyd gan Sheen ar gyfer nodi a datblygu doniau a chreu llwybrau i swyddi ar y llwyfan ac oddi arno ac o flaen neu y tu ôl i’r camera ar gyfer actorion, awduron, cyfarwyddwyr, criw technegol a’r rhai nad ydynt yn gweithio yn y sector eto. 

Gan edrych ar draws Cymru, bydd y prif sgowt diwylliant yn mynd ati i wylio cynyrchiadau theatr, perfformiadau a sioeau ieuenctid, amatur a phroffesiynol, gyda’r bwriad o nodi a datblygu doniau sydd â’r potensial i weithio i Welsh National Theatre a BBC Studios. 

Mae BBC Studios yn gwmni cyfryngau byd-eang a aned o’r BBC, sy’n creu ac yn dosbarthu cynnwys mwyaf poblogaidd y byd, yn ogystal â chreu a meithrin brandiau eiconig. Mae cynyrchiadau BBC Studios Drama Productions yn cynnwys EastEnders, Silent Witness, Father Brown a Sister Boniface.  Nod y bartneriaeth yw denu doniau cynhyrchu a chreadigol newydd o Gymru i gynyddu presenoldeb Cymru ar raglenni fel Casualty, Pobol y Cwm, ac Anfamol, sioeau sy’n cael eu creu yn stiwdios Porth y Rhath.  

Meddai Michael Sheen: “Lle roedd y Welsh Not yn mygu mynegiant Cymreig yn y bedwaredd ganrif ar bymtheg a dechrau’r ugeinfed ganrif, uchelgais Welsh Net yw ei hyrwyddo, gan greu llwybrau sydd wedi diflannu, neu nad oedd yn bodoli, i helpu gwneuthurwyr theatr dawnus ledled Cymru i oresgyn y rhwystrau maen nhw’n eu hwynebu yn y diwydiant. 

“Wrth dyfu i fyny ym Mhort Talbot, a chwarae pêl-droed ar gae drws nesaf i’r A48, ro’n i bob amser yn gwybod bod cyfle y byddai ’na ‘sgowt’ yn gwylio. Rhywun o’r ardal leol oedd yn cael y dasg gan glybiau proffesiynol i gadw llygad am ddoniau newydd. Roedd hynny’n golygu, waeth pa mor anodd oedd y daith yn y pen draw, roedd yna bosibilrwydd o lwybr i’r brig. Dw i eisiau i bob person ifanc, amatur a phroffesiynol sy’n perfformio neu’n gweithio tu ôl i’r llen yng Nghymru, gael yr un llwybr posib yna at frig y daith greadigol.”

Ychwanegodd Sharon Gilburd, prif swyddog gweithredol sefydlol y Welsh National Theatre: “Mae ein partneriaeth â BBC Studios ar y Welsh Net yn foment bwysig i’r don nesaf o ddoniau creadigol o Gymru. Nid yn unig y bydd y prif sgowt diwylliant yn chwilio am ddoniau sy’n haeddu cyfleoedd ehangach ar y llwyfan, ond nawr ar y sgrin hefyd, diolch i BBC Studios, gan adeiladu llwybr amlwg ar gyfer cynyrchiadau’r ddau sefydliad yn y dyfodol. Mae ’na gyfnod cyffrous o’n blaenau.” 

Meddai Kate Oates, Pennaeth cwmni BBC Studios Drama Productions: “Mae dod o hyd i ddoniau newydd a’u meithrin yn flaenoriaeth wirioneddol i ni, ac rydyn ni wrth ein bodd yn gweithio mewn partneriaeth â Welsh National Theatre i ddod o hyd i bobl greadigol newydd gwych o Gymru. Rydyn ni wrth ein bodd gyda beth welson ni o’r gwaith sydd eisoes ar y gweill, ac rydyn ni’n edrych ymlaen i weld beth ddaw nesaf.” 

Meddai Roxanne Harvey, Uwch Gynhyrchydd ar Casualty: “Mae Casualty wedi chwarae rhan allweddol yn natblygiad y gymuned gynhyrchu greadigol yng Nghymru ers dros ddegawd.  Ochr yn ochr â’n rhaglen allgymorth arobryn dan arweiniad Hannah Williams, rydyn ni wrth ein bodd y bydd y cydweithrediad newydd yma â Welsh National Theatre yn sefydlu llwybr ar gyfer y genhedlaeth nesaf o ddoniau Cymru.”

Bydd y prif sgowt diwylliant yn chwarae rhan allweddol wrth sefydlu gweledigaeth Michael Sheen ar gyfer y Welsh Net, gan ddylunio ac adeiladu’r fframwaith i helpu i greu rhwydwaith o sgowtiaid ledled Cymru dros y misoedd a’r blynyddoedd nesaf.  Bydd y sgowtiaid diwylliant yn nodi doniau ac yn cefnogi eu datblygiad drwy nifer o lwybrau, gan gynnwys mynediad at hyfforddiant a chyfleoedd yn y sector ffilm, teledu a theatr yng Nghymru, a thu hwnt.  Bydd y sgowtiaid yn nodi pobl dalentog ar gyfer swyddi fel cyfarwyddwyr, cynhyrchwyr, awduron a rolau arbenigol eraill – nid yn unig ar gyfer pobl ar lwyfan ac o flaen y camera. Mae’r broses recriwtio ar gyfer y swydd ar agor o heddiw ymlaen a gellir ei gweld yma.

DIWEDD

I gael rhagor o wybodaeth, cysylltwch â Daniel Tyte (daniel.tyte@workingword.co.uk) yn Working Word drwy +44 29 2045 5182 / +44 7742 251232.

BBC Studios

Mae BBC Studios yn is-gwmni masnachol i Grŵp y BBC gyda gwerthiant o £2.1 biliwn (2021/22: £1,630 miliwn). Mae’r busnes, sy’n gallu mynd â syniad yn ddi-dor o’r meddwl i’r sgrin a thu hwnt, wedi’i adeiladu ar ddau faes gweithredu: y Stiwdio Gynnwys fyd-eang, sy’n cynhyrchu, yn buddsoddi ac yn dosbarthu cynnwys yn fyd-eang, a Sianeli a Ffrydio, gyda sianeli, gwasanaethau a mentrau ar y cyd â brand y BBC yng ngwledydd Prydain ac yn rhyngwladol. Mae’r busnes yn creu tua 2,500 awr o raglenni arobryn ym Mhrydain bob blwyddyn, gyda dros 80% o gyfanswm refeniw BBC Studios yn dod gan gwsmeriaid nad ydynt yn gwsmeriaid BBC gan gynnwys Discovery, Apple a Netflix. Mae ei gynnwys yn cael ei gydnabod yn rhyngwladol ar draws ystod eang o genres ac arbenigeddau, gyda brandiau fel Strictly Come Dancing/Dancing with the Stars, Top Gear, y gyfres Planet, Bluey a Doctor Who. BBC.com yw llwyfan newyddion digidol byd-eang BBC Studios, sy’n cynnig newyddion rhyngwladol cyfoes, dadansoddiad manwl a straeon nodwedd.